Rhagarweiniad i godi arian yn ddigidol

Mae codi arian yn ddigidol yn ymwneud â defnyddio technoleg i drosoli incwm newydd – neu drosoli incwm presennol yn well – ar gyfer elusen.

Mae’r diffiniad yma’n cwmpasu llawer o wahanol fecanweithiau a mathau o godi arian yn ddigidol, gan gynnwys:

• Tudalennau rhoi ar-lein
• Tudalennau codi arian cymunedol
• Systemau Rheoli Perthnasau Cwsmeriaid (CRM)
• Llwyfannau rhoi a chyfrifyddu integredig

Ni ddylai strategaeth codi arian yn ddigidol byth ddisodli strategaeth codi arian ‘draddodiadol’ – dylai’r ddwy ategu ei gilydd. Mewn byd delfrydol, bydd defnyddio teclynnau digidol yn hwyluso’r gwaith o gyflawni strategaeth codi arian sefydliadol yn well ac yn gyrru’r cynllun busnes yn ei flaen.

Canfu arolygon diweddar fod rhoi ar-lein wedi cynyddu 97% ers dechrau’r pandemig Covid-19, a bod bron i 80% o elusennau bellach yn defnyddio dulliau digidol i gyrraedd cynulleidfaoedd newydd. Erbyn hyn, mae hanner yr elusennau yn gweld codi arian yn ddigidol yn flaenoriaeth. Mae 90% o boblogaeth y DU yn defnyddio’r rhyngrwyd yn rheolaidd ac yn treulio 2 awr 51 munud y dydd ar gyfartaledd ar-lein

Gall teclynnau digidol alluogi sefydliadau treftadaeth i gyrraedd cynulleidfaoedd newydd, cynyddu incwm, a lleihau’r capasiti sydd ei angen o du staff neu wirfoddolwyr i wasanaethau perthnasau gyda chefnogwyr presennol.

Yn gyffredinol, dylai sefydliadau ganolbwyntio ar wneud un neu ddwy elfen o godi arian yn ddigidol yn dda iawn, yn hytrach na cheisio lansio ar bob llwyfan a theclyn sy’n bodoli. Mae hyn yn arbennig o wir ar gyfer sefydliadau treftadaeth bach lle mae’r capasiti’n gyfyngedig ac mae’n rhaid ei gymhwyso’n dda.

Sut i ysgrifennu a rhoi strategaeth codi arian yn ddigidol ar waith

1. Diffinio amcanion

Yr hyn sy’n allweddol i unrhyw strategaeth yw deall yn glir yr hyn rydych chi’n ceisio’i gyflawni. Yn union fel nad yw’n bosib cynllunio taith heb gyrchfan, nid oes modd cynllunio’r camau nesaf mewn maes penodol heb wybod beth yw eich nod. Bydd gan wahanol sefydliadau wahanol amcanion o ran strategaeth Codi Arian yn Ddigidol. Dylai’r rhain fod yn uchelgeisiau darlun mawr, cyffredinol y gall y strategaeth a’r targedau penodol oddi mewn iddi helpu i’w gwireddu. Er enghraifft:

• Cynyddu incwm o du rhoddion unigol i 25% o incwm y sefydliad
• Lleihau’r amser mae gwirfoddolwyr yn ei dreulio’n gofyn am roddion neu’n eu prosesu
• Tyfu ymwybyddiaeth o effaith ein sefydliad yn y gymuned leol
• Casglu data am 40% o roddwyr er mwyn deall ein cynulleidfaoedd a’n cefnogwyr yn well

Ystyriwch y cwestiynau canlynol:

• Pam rydych chi’n lansio strategaeth codi arian yn ddigidol?
• Sut olwg fyddai ar lwyddiant yn eich barn chi?

Cytunwch ar un amcan craidd – sef y flaenoriaeth ganolog i’ch sefydliad. Peidiwch â chael eich temtio ar hyn o bryd i ddweud, ‘rydyn ni am gyflawni’r uchod i gyd’.

2. Ystyried ble rydych chi

Cyn i chi ddechrau ystyried strategaeth ar gyfer codi arian yn ddigidol yn y dyfodol, mae’n bwysig i chi gymryd amser i ystyried ble rydych chi fel sefydliad ar hyn o bryd. Gyda dealltwriaeth glir o hyn, mae’n haws ac yn fwy effeithiol wedyn i roi cynlluniau ar waith at y dyfodol.

Cynhaliwch archwiliad mewnol, sy’n adolygu:

• Pa weithgarwch codi arian yn ddigidol sy’n digwydd ar hyn o bryd, neu sydd wedi digwydd yn y gorffennol?
• Pa sianeli rydych chi’n eu defnyddio ar gyfer codi arian yn fwy cyffredinol, a pha lefel o lwyddiant maen nhw’n ei gweld? Edrychwch nôl dros y tair i bum mlynedd diwethaf.
• Faint o roddwyr sydd gennych chi? Faint o bobl ydych chi’n eu cyrraedd fel cynulleidfaoedd?
• Pa adnoddau sydd gennych eisoes yn eu lle? Gallai hyn fod yn staff neu’n wirfoddolwyr gydag arbenigedd penodol, neu’n adnoddau digidol fel cyfrifiaduron, meddalwedd neu lwyfannau ar-lein.

O’r archwiliad mewnol yma, nodwch unrhyw Gryfderau, Gwendidau, Cyfleoedd neu Fygythiadau a allai effeithio ar lwyddiant strategaeth codi arian yn ddigidol.

3. Ystyried yr amgylchedd allanol

Yn ogystal ag adolygu eich cyd-destun mewnol, mae’n bwysig i strategaeth ymateb i ddata allanol. Ar gyfer strategaeth codi arian yn ddigidol, dylai hyn gynnwys:

• Meincnodi yn erbyn cyfoedion: pa sefydliadau ydych chi’n eu hedmygu? Pwy sydd â’r presenoldeb digidol yr hoffech ei gael? Pa declynnau a llwyfannau maen nhw’n eu defnyddio? Beth yw eu dadansoddiad incwm?

Bydd ymgymryd â gwaith meincnodi trylwyr o 8-10 o sefydliadau tebyg sydd wedi’u datblygu ymhellach o ran eu gweithgarwch digidol yn eich helpu i ddeall beth sydd eisoes yn gweithio i sefydliadau fel chi, a bydd hyn, yn ei dro, yn eich helpu i osod strategaeth at y dyfodol.

• Ymchwil gyd-destunol: beth sy’n digwydd yn eich sector a’ch ardal leol? Beth yw’r gwir angen rydych chi’n ymateb iddo? Beth yw lefel cymhwysedd digidol eich cynulleidfaoedd a’ch gwirfoddolwyr? Beth yw goblygiadau hyn ar gyfer strategaeth codi arian yn ddigidol?

Drwy ymchwil gallwch chi sicrhau bod cynhyrchion ac ymgyrchoedd digidol rydych chi’n eu rhoi ar waith yn berthnasol ac yn briodol i’ch cynulleidfa a’r cyd-destun rydych chi’n gweithredu ynddo.

4. Adnabod eich cynulleidfa

Dylai strategaeth codi arian yn ddigidol ganolbwyntio ar y gynulleidfa: mae gan wahanol bobl lefelau amrywiol iawn o hyder ac arbenigedd gyda llwyfannau digidol, ac am hynny, dylai strategaeth ystyried pwy fydd yn ymgysylltu â’ch cynhyrchion ac felly sut y dylid eu dylunio.

Pwy yw’ch cefnogwyr chi? Rhowch eich hun yn eu hesgidiau nhw. Meddyliwch am eu hymddygiad ar-lein ac oddi ar-lein. Pa lwyfannau maen nhw’n eu defnyddio? Beth maen nhw eisiau’i gael o’ch presenoldeb digidol? Beth yw eu taith drwy eich cyfryngau cymdeithasol a’ch gwefan? Ble mae eu hanghenion yn cael eu diwallu, a ble nad ydyn nhw’n cael eu diwallu? Sut gall y maes digidol ddiwallu eu hanghenion yn well?

5. Adnabod a blaenoriaethu teclynnau

Unwaith y byddwch chi’n gwybod beth rydych chi am ei gyflawni a phwy rydych chi’n ceisio ymgysylltu â nhw, mae’n bryd ystyried y teclynnau y byddwch chi’n eu defnyddio i gyflawni hynny

• Cyfryngau cymdeithasol fel Twitter, Facebook, Instagram a LinkedIn, lle mae gan eich elusen broffil sefydliadol a lle mae’n ymgysylltu â’i gynulleidfaoedd yn uniongyrchol. Mae rhai o’r llwyfannau hyn bellach yn caniatáu codi arian.
• E-bost, boed yn uniongyrchol neu drwy newyddlenni a phost-dafliadau
• Gwefan, gan gynnwys dylunio cynnwys cyffredinol, Optimeiddio Peiriannau Chwilio, a thudalennau codi arian
• Llwyfannau trydydd parti fel JustGiving, sy’n caniatáu i unigolyn godi arian ar eich rhan, neu le efallai na fydd gennych reolaeth uniongyrchol dros y ffordd caiff eich elusen ei phortreadu.
• Teclynnau cynhyrchu cynnwys fel Canva sy’n eich galluogi i gynhyrchu testun, fideo a delweddau i’w defnyddio mewn ymgyrchoedd digidol
• Meddalwedd tu cefn sy’n eich cefnogi i symleiddio codi arian yn eich tîm staff neu’ch cronfa wirfoddolwyr

Efallai mai dim ond unwaith y bydd angen rhai teclynnau – neu gamau un tro i’w rhoi ar waith – a bydd eraill yn dod yn rhannau rheolaidd o’ch gwaith wrth gyflawni’r strategaeth.

6. Gosod targedau CAMPUS

Unwaith y byddwch chi’n hyderus yn eich cynulleidfaoedd a’r teclynnau y byddwch chi’n eu defnyddio, nodwch 3 i 5 o dargedau CAMPUS a fydd yn eich helpu i hyrwyddo eich un amcan craidd. CAMPUS (SMART yn Saesneg) yw:

• • Cyraeddadwy
  • Amserol
  • Mesuradwy
  • Penodol
  • Uchelgeisiol
  • Synhwyrol

Os mai eich amcan cyffredinol yw cynyddu incwm o roddion ar-lein, gall targedau CAMPUS gynnwys:

• Sefydlu statws elusennol ar Facebook a sicrhau tri pherson i godi arian ar eu pen-blwydd ar Facebook erbyn mis Ebrill 2023
• Cynyddu cliciau o’r cyfryngau cymdeithasol i’r wefan 10% erbyn mis Rhagfyr 2022
• Tyfu maint rhoddion cyfartalog 10% drwy awgrymu symiau i’w rhoi a negeseuon gwell erbyn mis Rhagfyr 2023

7. Gwerthuso, Adolygu ac Addasu

Unwaith y bydd gennych chi strategaeth codi arian yn ddigidol ar waith gyda thargedau CAMPUS clir, sicrhewch eich bod yn sefydlu proses glir ar gyfer adolygu’r targedau hyn. Os oes gennych chi dîm staff, gallai hyn gael ei gynnal ganddyn nhw, neu gall fod yn eitem agenda newydd i’r bwrdd ei hystyried.

Yn ogystal ag asesu cynnydd yn erbyn targedau CAMPUS, ystyriwch a oes angen i chi addasu eich teclynnau neu’ch targedau wrth i’r strategaeth ddechrau. Wrth i chi symud ar hyd strategaeth codi arian yn ddigidol, mae’n anochel y byddwch chi’n dysgu mwy am eich cynulleidfaoedd a’r prosesau sy’n gweithio orau i’ch sefydliad, felly byddwch yn agored i addasu’r strategaeth yn unol â gwybodaeth newydd.

Ystyriwch y cwestiynau canlynol:

• Sut byddwch chi’n cadw golwg ar yr hyn sy’n gweithio?
• Pa mor aml byddwch chi’n adolygu perfformiad?
• Sut bydd canfyddiadau’n dylanwadu ar strategaeth y dyfodol?
• A oes capasiti mewn timau staff neu gyfarfodydd bwrdd i ystyried hyn, neu a oes angen capasiti newydd?

Yn ogystal â gwerthuso perfformiad targedau CAMPUS, mae’n bwysig i bwy bynnag sy’n ymwneud â rhoi eich strategaeth ddigidol ar waith fabwysiadu dull sy’n seiliedig ar “brofi a dysgu”. Un o gryfderau allweddol y maes digidol yw’r gallu i roi cynnig ar wahanol bethau yn hawdd a gweld beth sy’n gweithio: er enghraifft, efallai y byddwch chi’n segmentu eich cynulleidfa ac yn rhoi cynnig ar ddwy set wahanol o negeseuon e-bost i weld p’un sy’n arwain at y canlyniadau gorau.

Casgliad

Pob lwc gydag ysgrifennu a rhoi eich strategaeth codi arian yn ddigidol a’i hesblygu. Mae pawb yn dechrau yn rhywle, ac mae’r maes digidol yn gallu bod yn werthfawr i bob sefydliad. Bydd gofyn myfyrio a dysgu i optimeiddio, ond gallwch chi ei wneud yn werth chweil i’ch sefydliad.

Browse related resources by smart tags: