1. Cyflwyniad

Trwy ddatblygu strategaeth ddigidol, bydd modd ichi gael ymdeimlad o gyfeiriad. Hefyd, bydd yn dangos yn glir i’ch tîm a’ch ymddiriedolwyr sut fath o fuddsoddiad sy’n angenrheidiol er mwyn cadw mewn cysylltiad ag amgylchedd ar-lein sy’n cyflym esblygu. Heb strategaeth glir, mae’n bosibl y byddwch mewn sefyllfa lle byddwch yn ymateb yn fyrbwyll i gyfleoedd digidol. Yn y brys i ddilyn y diweddaraf, efallai y bydd eich penderfyniadau dipyn yn rhy fyrbwyll, heb gynllun na chydlyniant digonol yn perthyn iddynt. Yn yr ystyr hwn, mae strategaeth ddigidol yn rhyw fath o ‘fap trywydd’ a all eich helpu i aros ar y llwybr iawn a chyflawni nodau digidol eich sefydliad.

 

2. Strategaeth entrepreneuraidd

Yn yr adnodd hwn mae ein harbenigwr, Stephen Dobson o Brifysgol Leeds, yn archwilio sut y gellir rhoi strategaeth ar waith yn eich sefydliad, a pham y bydd yn ddefnyddiol.

Mae’r gallu i newid cyfeiriad yn gyflym yn gryfder strategol i sefydliadau bach. Trwy fod yn ystwyth yn y gofod digidol, bydd modd i’ch sefydliad fanteisio ar gyfleoedd yn gyflym, er enghraifft trwy ddefnyddio platfformau cyfryngau digidol sy’n bodoli eisoes i ymateb yn gyflym i ddigwyddiadau neu dueddiadau cyfredol. Mae’r strategydd sefydliadol Henry Mintzberg^[1] yn disgrifio’r math hwn o arwain fel mabwysiadu ‘strategaeth entrepreneuraidd’, fel y dangosir yn y diagram isod. Mae’r arweinydd (neu’r ymddiriedolwyr) yn pennu gweledigaeth – gweledigaeth sydd, o bosibl, yn ymwneud â mabwysiadu’r dechnoleg neu’r adnodd digidol diweddaraf – ac mae’r staff yn dilyn y weledigaeth hon, fel y dangosir gan y saethau yn y diagram.

Er bod y math hwn o strategaeth entrepreneuraidd ystwyth yn golygu y gellir cymryd camau’n ddi-oed, mae hefyd yn ei gwneud hi’n bosibl ichi newid eich gweledigaeth yn gyflym wrth i gyfle neu dechnoleg newydd ddod i’r fei. Gall y newid hwn beri i’ch tîm weithio mewn modd anghyson neu fethu â symud yn ddigon cyflym o’r hen weledigaeth i’r weledigaeth newydd, gan arwain at ddryswch ynglŷn â chyfeiriad y sefydliad.

3. Pam mae strategaeth ddigidol yn ddefnyddiol?

Gall strategaeth ddigidol helpu i gynnig cyfeiriad cliriach ynglŷn â sut fath o dechnoleg y gall fod ei hangen, a pham. Caiff ei seilio ar nodau eich sefydliad treftadaeth, ac felly bydd yn helpu i leihau unrhyw newid cyflym o un weledigaeth i weledigaeth arall – rhywbeth a all ddigwydd o dro i dro wrth ymateb i newidiadau yn y tirlun digidol. Bydd strategaeth ddigidol yn eich helpu i ddatblygu meincnodau ac amcanion, ynghyd â deall eich cynulleidfa darged, gwella eich dull marchnata a sicrhau gwell adenillion o fuddsoddi.

Datblygu meincnodau ac amcanion

Heb bennu nodau penodol, bydd yn anodd penderfynu pa dechnoleg i ganolbwyntio arni, pa sgiliau i geisio’u meithrin a pha blatfformau a sianeli i’w defnyddio wrth gysylltu â’ch cymunedau ar-lein. Dylai eich strategaeth nodi’n glir beth yw eich amcanion er mwyn ichi allu seilio penderfyniadau ynghylch technolegau digidol ar ba un a ydynt yn ategu’r amcanion penodol hyn yn uniongyrchol, ai peidio. Beth am fynd ati i bennu meincnodau y gallwch eu defnyddio i fesur pethau fel:

• Gwerthiannau ar-lein
• Cliciau, sylwadau neu fathau eraill o ymgysylltu ar y wefan
• Chwiliadau organig
• Chwiliadau y talwyd amdanynt
• Ymatebion i e-byst marchnata
• ​Ymgysylltu â’r cyfryngau cymdeithasol (hoffi, rhannu, sylwadau)
• Y nifer o staff sydd wedi dilyn hyfforddiant perthnasol.

Deall eich cynulleidfa darged

Eich cynulleidfa yw’r prif ganolbwynt ar gyfer gweithgareddau eich sefydliad, felly bydd yn hanfodol ichi roi eich cynulleidfa wrth galon a chraidd eich strategaeth. Trwy wybod a deall yn well pwy yw eich cynulleidfa darged a ble y gellir dod o hyd iddi, bydd modd ichi greu digwyddiadau, gweithgareddau a chynnwys gyda’r gynulleidfa honno mewn golwg. Bydd y penderfyniadau a wnewch o ran sut fath o gynnwys digidol i’w ddatblygu a pha sianeli i’w defnyddio yn cael eu hysgogi gan eich adnabyddiaeth o’ch cynulleidfa.

Mae Matrics Ansoff, a ddatblygwyd gan H Igor Ansoff ym 1957 ar gyfer yr Harvard Business Review, yn ffordd ddefnyddiol o weld sut y gellir gosod ymgysylltu â chynulleidfaoedd oddi mewn i strategaeth ddigidol.

Os ydych yn ceisio cyrraedd eich cynulleidfa bresennol gyda thechnolegau, cynhyrchion a gwasanaethau presennol, yna bydd eich strategaeth yn canolbwyntio i raddau mwy ar dreiddio i’r farchnad. Felly, eich prif flaenoriaeth fydd ymgysylltu i raddau mwy â’ch ymwelwyr a’ch cynulleidfa bresennol – trwy gyfrwng ailymweliadau, er enghraifft.

Os ydych eisiau defnyddio eich technoleg a’ch galluoedd presennol i gyrraedd cynulleidfaoedd newydd, yna byddwch yn ymhél â gweithgareddau’n ymwneud â datblygu’r farchnad. Efallai y byddwch yn canolbwyntio ar geisio cyrraedd cynulleidfaoedd ehangach, grwpiau anodd eu cyrraedd neu grŵp demograffig/oedran gwahanol trwy gyfleu’n well y pethau a gynigir gennych ar y pryd.

Neu efallai eich bod yn dymuno defnyddio technolegau newydd i ddatblygu rhagor o gynnwys digidol er mwyn parhau i ymgysylltu â’ch cynulleidfaoedd presennol. Mewn achosion o’r fath, byddwch yn canolbwyntio ar ddatblygu cynhyrchion. Efallai y byddwch eisiau i’ch staff ddysgu sgiliau newydd er mwyn iddynt allu defnyddio technoleg a chyfarpar newydd, neu efallai y byddwch yn dymuno comisiynu dylunwyr neu lunwyr cynnwys digidol i helpu i ddatblygu arlwy newydd.

Yn olaf, y strategaeth â’r risg a’r ansicrwydd mwyaf yn perthyn iddi, yn ddi-os, yw datblygu technolegau newydd, gwasanaethau newydd neu gynhyrchion digidol newydd er mwyn cyrraedd cynulleidfaoedd newydd. Gelwir y strategaeth hon yn amrywiaethu. Mae’n bosibl y byddwch yn gweithio gydag elfennau anhysbys – o ran y gwasanaethau neu’r technolegau newydd a ddefnyddiwch a hefyd o ran y cynulleidfaoedd newydd y ceisiwch eu denu.

Datblygu dull marchnata gwell

Bydd strategaeth ddigidol yn eich helpu i greu neges a dull cydlynol wrth ymgysylltu â’ch cynulleidfa ar-lein. Yn achos yr holl sianeli marchnata digidol a ddefnyddiwch i hyrwyddo eich sefydliad a’i waith, dylent deimlo fel pe baent yn cydweddu â’i gilydd i greu cyfanwaith cyfannol. Bydd strategaeth ddigidol yn eich helpu i gynnal y brand neu ‘bryd a gwedd’ yr hyn a wnewch, ni waeth pa sianel neu blatfform ar-lein a ddefnyddiwch.

Cyllidebu ac adenillion o fuddsoddi

Os bydd gennych strategaeth glir ar waith, byddwch mewn sefyllfa well i benderfynu ymlaen llaw ar unrhyw atebion angenrheidiol, ac felly unrhyw wariant cysylltiedig – boed y gwariant hwnnw’n ymwneud ag adnoddau ffisegol neu adnoddau dynol. Ymhellach, mae gwybod sut y mae eich cyllideb ddigidol yn ymrannu yn ffordd werthfawr o sicrhau ymrwymiad eich ymddiriedolwyr, yn enwedig os oes gennych rai newidiadau mawr yn yr arfaeth.

Os bydd gennych feincnodau priodol ar waith, gallwch weld hefyd a yw’r gwariant ar adnoddau digidol, marchnata a meithrin sgiliau yn esgor ar adenillion da o fuddsoddi. Er enghraifft, os ydych wedi buddsoddi mewn dulliau codi arian ar y cyfryngau cymdeithasol, gallwch gymharu’r gwariant ar farchnata ar draws y platfformau perthnasol â’r refeniw y llwyddwyd i’w godi trwy gyfrwng y sianeli hyn.

Cyfeiriadau

 [1] Mintzberg, H. and Waters, J.A., 1985. Of strategies, deliberate and emergent. Strategic management journal, 6(3), tt.257-272.

Browse related resources by smart tags:

Benchmarking Digital strategy Entrepreneurship Leadership Objectives Return on investment Vision

Resource type: Articles

Except where noted and excluding company and organisation logos this work is shared under a Creative Commons Attribution 4.0 (CC BY 4.0) Licence

Please attribute as: "Developing your digital strategy (2022) by Dr Stephen Dobson supported by The National Lottery Heritage Fund, licensed under CC BY 4.0