1. Beth yw eich anghenion o ran sgiliau digidol

Efallai y bydd eich sefydliad o’r farn ei fod angen gwybod am sawl agwedd ar ‘dechnolegau digidol’, ond ni fydd pob un o’r agweddau hyn yn bwysig o ran cyflawni eich nodau. Yn aml, mae sefydliadau treftadaeth yn teimlo dan bwysau i ddefnyddio’r dechnoleg ddigidol ddiweddaraf, ond gall hyn arwain at golli gwybodaeth neu sgiliau pwysig sy’n hanfodol i gyflawni eich cynllun busnes neu eich strategaeth ddigidol. Mae technolegau digidol wedi newid y math o wybodaeth y mae eich sefydliad ei hangen, ynghyd â newid nifer o’ch dulliau gweithio. Ond mae’n bwysig ichi ddeall sut y bydd hyn yn effeithio ar y sgiliau a’r galluoedd y bydd eich tîm eu hangen er mwyn eu defnyddio’n llwyddiannus.

Yn yr adnodd hwn, mae ein harbenigwr, Michael Turnpenny, Pennaeth Museum Development Yorkshire, yn esbonio sut y gallwch bennu, meithrin neu sicrhau sgiliau digidol pwysig. Byddwch yn dysgu am y modd y gall dulliau strategol o reoli adnoddau dynol eich helpu yn y defnydd a wnewch o sgiliau digidol a sut i flaenoriaethu eu datblygiad.

2. Y camau cyntaf

Er mwyn cynllunio ar gyfer eich anghenion o ran sgiliau digidol, rhaid ichi ddeall beth fydd y gofynion ar eich sefydliad yn y dyfodol a pha sgiliau a gwybodaeth sydd i’w cael o fewn eich tîm yn barod. Mae’n golygu y bydd angen ichi bennu bylchau posibl mewn sgiliau, ynghyd â chymryd camau i ymdrin â nhw. Byddwch angen i’r bobl iawn fod yn y lle iawn ar yr adeg iawn ac am y gost iawn.

Bydd tri pheth allweddol yn dylanwadu ar anghenion sgiliau eich sefydliad:

1. Yr amgylchedd y gweithiwch ynddo
2. Natur a disgwyliadau eich gweithlu
3. Sut y caiff y gwaith ei wneud (digido ac awtomeiddio).

Weithiau, bydd rhaid ichi gymryd dau gam yn ôl cyn y gallwch symud yn eich blaen. Mae cynllunio ar gyfer eich anghenion sgiliau yn un o’r adegau hynny. Yn anffodus, fe fydd eich sefydliad wedi mynd i’r afael â chryn dipyn o waith meddwl yn barod. Er mwyn ichi allu deall eich anghenion o ran sgiliau digidol, rhaid ichi adolygu unrhyw strategaethau a dogfennau cynllunio sy’n bodoli eisoes. Efallai y bydd hyn yn cynnwys rhestr o amcanion strategol, dadansoddiad PESTLE neu ddadansoddiadau eraill a gwblhawyd gennych. Beth am ddarllen rhagor am y dadansoddiad PESTLE ar wefan y Sefydliad Siartredig Personél a Datblygu (CIPD).

Ar gyfer pob un o’ch amcanion strategol, ewch ati i lunio dwy restr er mwyn ateb y cwestiynau canlynol:

1. Pa sgiliau digidol ydych chi eu hangen heddiw i gyflawni’r amcan hwnnw?
2. Pa sgiliau digidol y byddwch chi eu hangen yn y dyfodol i gyflawni’r amcan hwnnw?

Pwyntiau allweddol i’w cofio

• Dylai eich anghenion sgiliau digidol adlewyrchu eich sefydliad a’i amcanion.
• Bydd angen i’ch anghenion sgiliau digidol fod mor syml neu mor gymhleth ag y dymunwch iddynt fod – bydd y cwbl yn dibynnu ar yr hyn y dymunwch ei gyflawni.
• Bydd nifer o’ch anghenion sgiliau digidol yn adlewyrchu’r amgylchedd y gweithiwch ynddo, ynghyd â natur a disgwyliadau eich gweithlu.
• Ni fydd uwchsgilio yn y platfform cyfryngau cymdeithasol diweddaraf o help i’ch sefydliad os na fydd eich cydweithwyr yn gwybod sut i gael gafael ar ffeiliau a storiwyd neu sut i ddefnyddio eich cronfa ddata rheoli casgliadau.

3. Sut i flaenoriaethu a meithrin sgiliau allweddol

Ar ôl ichi lunio rhestr o sgiliau eich sefydliad, bydd angen ichi ystyried sut i flaenoriaethu’r sgiliau hynny a phenderfynu sut i’w dysgu neu eu cadw. Yn gyntaf, nodwch a yw’r sgiliau hynny yn sgiliau y bydd yn rhaid i bawb feddu arnynt, ynteu a ydynt yn ymwneud â thimau penodol, neu rolau unigol hyd yn oed.

Mae’r fframwaith isod yn seiliedig ar ganllawiau matrics cymwyseddau a ddatblygwyd gan y Sefydliad Siartredig Personél a Datblygu (CIPD). Ceir enghraifft islaw’r fframwaith i ddangos sut y dylid ei ddefnyddio.

Matrics cymwyseddau’r CIPD

Sgìl	Cymwyseddau craidd	Cymwyseddau cyffredin	Cymwyseddau technegol neu gymwyseddau penodol i’r swydd	Cymwyseddau arwain	Meta-gymwyseddau
Sgìl A
Sgìl B
Sgìl C
Sgìl D

Enghraifft – sgiliau digidol

Sgìl	Cymwyseddau craidd	Cymwyseddau cyffredin	Cymwyseddau technegol neu gymwyseddau penodol i’r swydd	Cymwyseddau arwain	Meta-gymwyseddau
Sgiliau’n ymwneud â’r cyfryngau cymdeithasol		X
Blogio		X
Llunio a defnyddio technoleg 3D					X
Datblygu apiau			X

Gallwch lawrlwytho fersiwn Word o’r fframwaith hwn (176kb) a’i lenwi ar gyfer eich sefydliad eich hun. Bydd yr ymarfer hwn yn eich helpu i flaenoriaethu a chanolbwyntio ar eich anghenion allweddol o ran sgiliau digidol.

Ymestyn eich dadansoddiad

Ar ôl ichi bennu’r sgiliau digidol allweddol y mae arnoch eu hangen, ystyriwch sut i’w meithrin. Aeth David Ulrich ati i boblogeiddio’r fframwaith ‘Chwe Elfen’ er mwyn pennu’r ffordd orau o feithrin sgiliau a gwybodaeth eich tîm. Weithiau, ni fydd yn ofynnol ichi fod â sgìl drwy’r amser, ac ar adegau eraill efallai y bydd modd ichi ryddhau adnoddau trwy gael gwared â chydweithiwr nad yw’n gallu defnyddio’i sgiliau yn ddigon da.

Sgìl	Prynu	Meithrin	Benthyg	Cadw	Gwaredu	Symud
	(Recriwtio pobl sy’n meddu ar y sgiliau hyn)	(Hyfforddi cydweithwyr presennol er mwyn iddynt ddysgu’r sgiliau hyn)	(Ffurfio partneriaeth ag ymgynghorydd neu sefydliad arall er mwyn trosglwyddo sgiliau)	(Dal gafael ar bobl dalentog)	(Cael gwared ag unigolion nad ydynt yn perfformio’n dda)	(Symud pobl fedrus i swyddi uwch)
Sgìl A e.e. storio a rhannu ffeiliau		X Mae gennym gyllideb hyfforddi ac nid ydym yn tueddu i recriwtio staff newydd yn aml iawn. Mae modd cael gafael yn rhwydd ar y sgìl hwn.
Sgìl B
Sgìl C
Sgìl D

Gallwch lawrlwytho templed Word o’r fframwaith ‘Chwe B’ (176kb) i’ch helpu i fyfyrio ar y ffordd orau o feithrin sgiliau eich sefydliad.

Rhagor o adnoddau

Harvard Business Review, ‘Why Your Organization’s Future Demands a New Kind of HR’

CIPD, ‘Competence & Competency Frameworks’

Barn y CIPD ynglŷn â sgiliau hanfodol

One by One: Building digitally confident museums

Browse related resources by smart tags:

Digital tools Skills Staff Team Training Workforce development

Resource type: Articles

Except where noted and excluding company and organisation logos this work is shared under a Creative Commons Attribution 4.0 (CC BY 4.0) Licence

Please attribute as: "Identifying and prioritising your digital training requirements (2022) by Michael Turnpenny supported by The National Lottery Heritage Fund, licensed under CC BY 4.0