1. Rhagarweiniad

Mae’r dirwedd farchnata digidol yn hynod o gyflym, wedi’i gorlifo â llwyfannau newydd sy’n addo’r peth gorau nesaf, nodweddion llwyfan sy’n esblygu, a thueddiadau, ymgysylltu â defnyddwyr a disgwyliadau’n newid – sy’n ei gwneud yn anodd gwybod beth sy’n werth y byd a beth sy’n werth dim o ran eich gweithgarwch. Pam ddylech chi fod yn treulio amser i olrhain, gwerthuso a chymhwyso mewnwelediadau i’ch cynlluniau marchnata digidol, pan fydd hwn yn faes sy’n newid yn barhaus yn eich marchnata?

Mae’r achos dros ddefnyddio gwerthuso i gasglu data a mewnwelediadau i ddadansoddi a llywio eich marchnata digidol yn y dyfodol yn anhepgor. Ydych chi’n gwybod pa gynnwys sy’n cael ei ffafrio fwyaf gan eich tanysgrifwyr e-bost? Mae’r data hwn ar gael yn rhwydd wrth ddefnyddio llwyfan marchnata e-bost ac os nad ydych chi’n defnyddio’r data hwn i gynllunio’r newyddlenni e-bost sydd ar y gorwel gennych, yna rydych chi’n gweini stêc a sglodion i lysieuwr, yn y bôn, sy’n anghwrtais (ymddiriedwch ynof, fe ddigwyddodd i mi, ac nid yw’n ystyriol iawn o gwsmeriaid pan na fyddant yn cael eu clywed.)

Mae’r achos dros ddefnyddio gwerthuso i gasglu data a mewnwelediadau i ddadansoddi a llywio eich marchnata digidol yn y dyfodol yn anhepgor.

 

2. Troi data’n fewnwelediadau y gellir gweithredu arnynt

Naw rheswm pam y dylech chi droi’ch data’n fewnwelediadau y gellir gweithredu arnynt:

1. Cael eich ysgogi’n wirioneddol gan ddata
Mae’r dyddiau pan gafodd penderfyniadau marchnata eu harwain gan: “rydyn ni bob amser wedi’i wneud fel hyn” ac “mae’n deimlad greddfol” wedi mynd. Mae angen i benderfyniadau marchnata gael eu penderfynu yn ôl yr hyn y mae eich data a’ch mewnwelediadau yn ei ddweud wrthych.
2. Bod yn fwy effeithlon
Bydd bod yn graff i’r hyn mae’ch data marchnata digidol yn ei ddweud wrthych yn eich helpu i ffocysu’n gliriach ar le i roi eich amser, eich cyllid a’ch adnoddau.
3. Bod yn fwy effeithiol
Defnyddiwch ddata perfformiad sianel-benodol i edrych ar eich nodau sefydliadol ac amcanion y sianel i benderfynu beth i’w flaenoriaethu a chanolbwyntio arno.
4. Datblygu ymgyrchoedd sy’n perfformio’n well 
Mae cadw golwg ar sut mae ymgyrch farchnata ddigidol yn perfformio ai peidio, yn eich galluogi i addasu gweithgarwch i gyflawni perfformiad gwell. Er enghraifft, gall gwybod pa sianel sy’n rhoi’r elw gorau i chi ar fuddsoddiad (ROI) olygu y gallwch benderfynu dyrannu mwy o gyllid neu adnodd yma wedyn.
5. Gwneud mwy o gynnwys rydych chi’n gwybod y bydd yn ennyn diddordeb eich cynulleidfaoedd
Mae gwybod beth yw’r math mwyaf poblogaidd o gynnwys ar gyfer eich ffrwd Twitter neu’ch cylchlythyrau e-bost yn golygu eich bod yn gallu gwneud penderfyniadau ynghylch ffrydiau cynnwys ar sail tystiolaeth.
6. Gadael i’ch gwefan weithio’n galetach i chi
Drwy wybod a defnyddio metrigau gwefannau, gallwch optimeiddio cynnwys a thudalennau perthnasol o’ch gwefan gyfan ar sail eu hanes pori, neu benderfynu a yw eich safle cyfan o werth, neu os mai dim ond tudalennau penodol sydd.
7. Segmentu’ch dull o ymdrin â chynulleidfaoedd 
Ystyriwch a fyddai mabwysiadu dull gweithredu wedi’i segmentu a/neu wedi’i bersonoli yn iawn i chi. Ystyr distyllu segmentu yw cymhwyso set o nodweddion i’ch data cynulleidfaoedd, ac yna teilwra’ch negeseuon i bob segment, sydd yn aml yn arwain at gyfraddau trosi uwch.
8. Datblygu ‘personâu defnyddwyr’
Mae llawer o sefydliadau o’r farn bod hyn yn ymarfer ystyrlon i’w gynnal, gan ei fod yn cyfleu eich gwahanol gynulleidfaoedd fel math o gymeriad, gydag enw, wyneb a phersonoliaeth yn seiliedig ar ddata ac ystadegau.
9. Gwneud penderfyniadau prisio gwell
Defnyddiwch declynnau darganfod data i nodi pwyntiau prisio ar gyfer eich gwaith, tueddiadau a newidynnau. Er enghraifft, newidiadau mewn ymddygiad a dewisiadau defnyddwyr, newidiadau mewn amodau economaidd.

Ble rydych chi’n dechrau gyda’ch arferion gwerthuso er mwyn newid eich dull o farchnata digidol i un sy’n cael ei ysgogi gan fewnwelediad? Dechreuwch gyda ‘nodau’.

 

3. Gosod ‘Nodau’

Mae llawer o’ch gwaith cynllunio marchnata digidol yn deillio o genhadaeth, nodau ac amcanion eich sefydliad. Cyn i chi allu penderfynu a yw eich gweithgarwch neu’ch ymgyrch farchnata ddigidol yn llwyddiant, mae angen i chi osod amcanion a nodau.

Gadewch i ni edrych ar hyn yn ymarferol:

Mae gosod nodau yn sicrhau bod eich sefydliad yn rhannu ac yn cytuno ar uchelgeisiau ac mae ganddo rywbeth i ymdrechu drosto. Yn fwy na hynny, mae’n darparu canllaw ar gyfer y metrigau marchnata digidol y byddwch yn eu defnyddio i fesur llwyddiant eich ymgyrchoedd a’ch cynlluniau.

Cyn i ni edrych ar ba fetrigau i’w cynnwys yn eich gwerthusiad, mae’n ddefnyddiol ystyried y canlynol yn eich dull gweithredu:

 Blociau adeiladu

• Olrheiniwch a mesur dim ond yr hyn sy’n ystyrlon ac yn berthnasol i’ch sefydliad, ei nodau a’i amcanion. Gellir cael gafael ar unrhyw fewnwelediad arall yn ôl yr angen drwy ddulliau dadansoddi a mewnwelediadau’r sianel unigol.
• Crëwch system olrhain syml y gellir ei rheoli. Mae systemau rhy gymhleth a llafurus yn ddwys o ran amser ac fel arfer, dyna le mae’r rhan fwyaf o sefydliadau’n methu – felly cadwch hi’n hawdd er mwyn llwyddo i aros ar y trywydd iawn.
• Ymrwymwch i amserlen ar gyfer pa mor aml y caiff metrigau eu casglu a phwy fydd yn rheoli hyn. Fel arfer, mae hyn yn fisol, ond gwnewch yr hyn sy’n iawn i’ch sefydliad, eich llif gwaith a’ch adnodd. Peidiwch â’i gadael yn rhy hir, gan y byddwch yn colli’r cyfle parhaus hwnnw i feithrin craffter a mireinio.
• Cytunwch ar y ffordd orau o ddosbarthu a gweithredu mewnwelediadau o’ch gwerthusiad marchnata digidol ar draws eich sefydliad.

 

4. Pa fetrigau i’w mesur?

O ystyried y swm anfeidrol o ddata sydd ar gael ar draws y sianeli digidol a Google Analytics, mae’n gallu gwneud llywio a gwybod beth i’w olrhain yn anodd os nad ydych yn glir lle i ddechrau.

Gan gadw’r egwyddorion blociau adeiladu uchod mewn cof, gadewch i ni archwilio pa fetrigau marchnata yn union y gallech eu defnyddio i fesur llwyddiant eich nodau ar draws twmffedi marchnata digidol gwefan, cyfryngau cymdeithasol ac e-bost.

Mae cynulleidfaoedd yn ymddwyn yn wahanol ar sianeli gwahanol, felly mae’n bwysig bod â nodau, amcanion a metrigau mesur sy’n benodol i’r sianel. I mewn â ni…

 

Gwefan

Heb os, Google Analytics (GA) yw’r teclyn mewnwelediadau gorau, mwyaf cynhwysfawr ac am ddim ar gyfer gwefannau. Os nad oes gennych gyfrif eisoes, mae’n gymharol syml i’w sefydlu: mae angen i chi gofrestru a chreu Cyfrif Google ac, os yw’n berthnasol, gofyn i’ch datblygwr gwe ychwanegu rhywfaint o god, ac rydych chi’n barod i fynd.

Rhybudd gorlwytho data mawr – er y gallai GA ddod yn hoff declyn newydd i chi, mae hefyd yn ddrysfa lle gallwch chi’n hawdd dreulio llawer o amser. Felly dyma rai o’m hawgrymiadau i o ran beth i’w olrhain:

1. Ymwelwyr
Nifer y bobl a ymwelodd â’ch gwefan neu’ch tudalen

2. Sesiynau
Nifer yr ymweliadau â’ch gwefan

3. Nifer yr ymweliadau â thudalen
Nifer yr ymweliadau â thudalen unigol

4. Y Tudalennau Mwyaf Poblogaidd
Edrychwch yn rheolaidd ar y tudalennau sy’n perfformio orau, gan y gall hyn ddarparu mewnwelediadau diddorol ac annisgwyl. Sicrhewch fod y tudalennau hyn yn cael eu hoptimeiddio

5. Traffig yn ôl Ffynhonnell
Olrheiniwch o ble mae ymweliadau’n dod h.y., chwilio organig, eich e-bost neu’ch sianeli cymdeithasol, ac ati

6. Traffig yn ôl dyfais
Dadansoddiad o draffig fesul dyfais fel eich bod yn deall ac yn ystyried anghenion y ddyfais, h.y. copi mwy cryno ar gyfer dyfais symudol

7. Atgyfeiriadau
Nodwch pa wefannau sy’n gwneud y nifer uchaf o atgyfeiriadau, byddwch yn ffrindiau â nhw, ac anfonwch gynnwys pwrpasol o safon atynt

8. Y Gyfradd Adlamu
Y ganran o ddefnyddwyr sy’n glanio ar eich gwefan ac yn gadael ar ôl gweld un dudalen; po isaf yw’r gyfradd adlamu, y mwyaf y maent yn ymddiddori

9. Trosiadau
Nifer y trosiadau, boed yn drosiadau ariannol neu’n weithgarwch arall

 

Marchnata e-bost

Gan ddibynnu ar y llwyfan marchnata e-bost rydych yn ei defnyddio, dylech allu olrhain a chyfrifo’r saith metrig mwyaf defnyddiol canlynol a fydd yn eich helpu i ddeall a chefnogi’r gwaith o wneud penderfyniadau sydd wedi’u hysgogi gan ddata.

1. Cyfradd agor (OR) %
Faint o bobl sy’n agor eich newyddlenni

2. Y Gyfradd Clicio Drwodd (CTR) %
Faint o bobl a agorodd y newyddlen a chlicio ar un o’r dolenni

3. Y Gyfradd Clicio i Agor (CTOR)%
Gallwch weithio hyn allan drwy rannu nifer y cliciau â nifer yr agoriadau. Pan fyddant yn cael eu holrhain yn rheolaidd, bydd y metrigau uchod yn eich galluogi i wybod meincnodau cyfartalog a’u rhoi mewn cyd-destun â rhai’r sector ehangach.

4. Cost Fesul Clic (CPC)
Rhannwch gost eich newyddlen e-bost â nifer y cliciau; mae hyn yn wych o ran deall enillion ar fuddsoddiad (ROI)

5. Cliciau ar Ddolenni
Olrheiniwch ba ddolenni a gliciwyd, cyfrifwch y cynnwys mwyaf a lleiaf poblogaidd o’ch newyddlen a defnyddio hwn i osod meini prawf ar gyfer creu cynnwys yn y dyfodol.

6. Dadansoddiad o’r dyfeisiau a ddefnyddiwyd
Darganfyddwch pa ddyfais mae eich tanysgrifwyr yn ei defnyddio i agor eich e-byst h.y. os mai dyfais symudol yw hi, yna sicrhewch fod y cynnwys yn cael ei optimeiddio.

7. Faint sy’n datdanysgrifio
Monitrwch a meincnodi i ddeall sut mae amlder, cynnwys a pherthnasedd yn effeithio ar hyn.

 

Facebook

Mae’n bwysig tynnu sylw at y ffaith bod cynnwys sy’n cael ei bostio’n organig ar Facebook, h.y. heb gyllideb, yn cyrraedd ychydig dros 5% o’ch dilynwyr ar gyfartaledd. Felly, mae’n hanfodol sicrhau eich bod yn gwneud y gorau o bostiadau, yn dyrannu cyllideb neu adnodd yn unol â nodau’r sianel. Mewn geiriau eraill, os nad ydych chi’n mynd i ddefnyddio data i wneud penderfyniadau ar Facebook, peidiwch â thrafferthu.

I gael mynediad i fewnwelediadau sianeli, sicrhewch fod gennych Creator Studio sy’n gysylltiedig â’ch cyfrif. Y pedwar maes mwyaf perthnasol o fewnwelediadau a fydd yn eich helpu chi a’ch sefydliad i ddysgu a llywio marchnata yn y dyfodol yw:

1. Demograffeg cynulleidfaoedd
Gwybod pwy yw eich cynulleidfa, ble maen nhw wedi’u lleoli, a pha gynnwys sy’n gweithio orau i adeiladu darlun sy’n cael ei seilio ar ddata a llywio penderfyniadau cynnwys ac adnoddau

2. Amlder postio
Gwybod y dyddiau, yr amseroedd a’r amlder gorau i bostio cynnwys

3. Cyfradd Ymgysylltu
Olrhain faint o bostiadau sy’n cael eu hoffi, yn derbyn sylwadau, yn cael eu rhannu ac sy’n achosi i bobl glicio drwodd i sefydlu meincnodau sianel a gosod targedau ar gyfer ymgyrchoedd

4. Cyrraedd
Olrhain dilynwyr newydd a’r nifer sy’n dad-ddilyn i chwilio am batrymau a chyfleoedd i gefnogi twf a chadw

 

Twitter

Gellir cyrchu dulliau dadansoddi Twitter yn hawdd a’u lawrlwytho o’ch cyfrif. Dylech fonitro’r canlynol:

1. Cyfradd Ymgysylltu
Dysgwch sut mae’ch trydariad cyfartalog yn perfformio – olrheiniwch gliciau, sawl gwaith mae’n cael ei hoffi, ei aildrydar, ei grybwyll (‘Mensh’), faint o sylwadau a geir, faint sy’n ymweld â’ch Proffil, a gosod meincnodau

2. Argraffiadau
Sawl gwaith mae postiad wedi ymddangos ar linell amser rhywun

3. Mensh Uchaf
Dyma’r mensh uchaf ar trydar (nifer y troeon y crybwyllwyd eich enw neu’ch brand) sydd wedi creu’r cyrraedd uchaf, ac un gwych i’w olrhain a gwybod fel y gallwch adeiladu cronfa o ymhelaethwyr ac anfon cynnwys atynt

4. Trydariad Gorau
Mae’r dangosfwrdd dadansoddi yn rhoi gwybod i chi am y trydariad sy’n perfformio orau, ac mae hyn yn hynod ddefnyddiol i fonitro o fis i fis i ddeall pa bostiadau sy’n perfformio’n dda

5. Dilynwr Gorau
Dyma un o’ch dilynwyr sydd â’r cyrraedd mwyaf ar eu sianel – unwaith eto gwnewch ffrindiau gyda nhw, ac anfon a theilwra cynnwys

 

Instagram a TikTok

Defnyddiwch yr ap i gael mynediad i ddulliau dadansoddi ar gyfer y ddwy sianel, a bydd angen cyfrif Creator Studio arnoch eto, ac ar gyfer TikTok sicrhewch fod gennych Gyfrif Pro.

1. Cyfradd Ymgysylltu
Dysgwch am berfformiad cyfartalog eich postiadau a’ch fideos – olrheiniwch faint sy’n eu hoffi, eu gwylio, sy’n gwneud sylwadau, sy’n ymweld â’ch Proffil a gosod meincnodau

2. Dilynwyr
Dilynwyr newydd, demograffeg

3. Cynnwys
Fideos cryfaf a gwannaf, olrheiniwch faint o bobl i gyd sy’n eu hoffi a’u rhannu, a beth yw’r amser gwylio cyfartalog, i ddeall yr hyn sy’n perfformio orau

 

Sut ydych chi’n trosi eich metrigau, eich data a’ch gwerthusiad yn grynodeb y gellir myfyrio arno?

Unwaith rydych chi wedi cytuno ar ba fetrigau rydych yn mynd i’w coladu, mae angen i chi weithredu fframwaith gwerthuso i dynnu hyn at ei gilydd mewn ffordd ystyrlon i’w rannu ar draws eich sefydliad. Mae’n bwysig cofio, wrth greu diwylliant sy’n seiliedig ar fewnwelediad, mai eich rôl chi, ochr yn ochr â gwybod eich gweithgarwch marchnata digidol, eich cyrraedd a’ch ymgysylltiad, yw datblygu llythrennedd data ar draws eich sefydliad, hefyd. Felly mae hynny’n golygu bod yn wybodus am ddata a defnyddio dulliau adrodd straeon i adeiladu’r arc naratif hwnnw – felly sut gallwch chi gyflawni hyn?

 

5. Awgrymiadau ar gyflwyno data

Pob lwc ar eich taith! Cofiwch, byddwch yn wynebu heriau a maglau, ac yn methu ond defnyddiwch y dysgu a’i roi ar waith. Parhewch i herio rhagdybiaethau a dewisiadau sefydliadol, peidiwch â chael eich rhwystro gan hyn – rydych yn herio ac yn newid eich sefydliad i gael ei arwain gan fewnwelediad a gwneud penderfyniadau sy’n seiliedig ar dystiolaeth.

 

Browse related resources by smart tags:

Analytics Campaign Digital engagement Digital marketing Digital marketing plan Insight Planning

Resource type: How to guide / Toolkit

Except where noted and excluding company and organisation logos this work is shared under a Creative Commons Attribution 4.0 (CC BY 4.0) Licence

Please attribute as: "How to evaluate the impact of your digital marketing to help improve your marketing and communications activities (2022) by Ranjit Kaur Atwal supported by The National Lottery Heritage Fund, licensed under CC BY 4.0